आज:  २०८२ भाद्र १३, शुक्रबार | Fri, 29, Aug, 2025 Search
FLASH NEWS

देवचुलीमा अन्तर समुह तीज गीत प्रतियोगिता सम्पन्न

    प्रकाशित २०८२ भाद्र ७, शनिबार (६ दिन अघि)


देवचुली । देवचुली नगरपालिका वडा नम्बर ११ मा तीज गीत प्रतियोगिता सम्पन्न भएको छ । हिन्दु महिलाहरुको महान चाड हरितालिका तीजको अवसरमा महिला कल्याण बहुउद्देश्यीय सहकारी संस्थाको आयोजना र देवचुली नगरपालिकाको सहयोगमा संस्थाको प्राङ्गणमा `सुरक्षित घर समृद्ध समाज, देवचुली नगरपालिकाको आवाज´ शीर्षकमा अन्तर समुह तीज गीत प्रतियोगिता गरिएको हो ।


महिला कल्याण बहुउद्देश्यीय सहकारी संस्थाका अध्यक्ष सरिता शर्माको अध्यक्षतामा भएको प्रतियोगितामा देवचुली नगरपालिकाका नगर प्रमुख हरिप्रसाद न्यौपानेको प्रमुख आतिथ्यता रहेको थियो । त्यसै गरि कार्यक्रममा देवचुली १३ का वडा अध्यक्ष एकदेव पौडेल, देवचुली १४ का वडा अध्यक्ष गोपाल थापा, कार्यपालिका सदस्य फुलमाया बिक, पार्वती अर्याल कंडेल, वडा सदस्यहरु, संस्थाका पुर्व अध्यक्ष, विभिन्न संघसंस्थाका प्रतिनिधि, सेयर सदस्यहरुको उपस्थिति रहेको थियो ।

प्रतियोगिता उदघाटन गर्दै नगर प्रमुख न्यौपानेले मौलिक तिज गीतको संरक्षण गर्दै नेपाली कला, धर्म र संस्कृतिको संरक्षण गर्नुपर्ने बताउनुभयो । पछिल्लो समयमा तीजका नाममा भएका विकृतिलाई निरुत्साहित गर्ने अभियान नै महिलाहरुले सुरु गर्नुपर्ने उहाँले बताउनुभयो ।


संस्थाको सेवा क्षेत्रभित्र रहेका समुहको सहभागिता रहेको प्रतियोगितामा साहारा आमा समूह, देवचुली-१४ ले प्रथम स्थान, सृजनसिल आमा समुह देवचुली-१५ ले द्वितीय स्थान, जनविकास आमा समुह, देवचुली-७ ले तृतीय स्थान र गणेश टोल नमुना आमा समुह, देवचुली-१० ले सान्त्वना स्थान प्राप्त गरेका थिए । बिजेता समुहहरुले क्रमशः प्रथम पुरस्कार नगद १० हजार रुपैयाँ, द्वितीय पुरस्कार नगद ७ हजार ५ सय रुपैयाँ, तृतीय पुरस्कार नगद ५ हजार रुपैयाँ र सान्त्वना पुरस्कार नगद २ हजार रुपैयाँ सहित प्रमाणपत्र प्राप्त गरेका थिए । प्रतियोगितामा २० वटा समुहको सहभागिता रहेको थियो ।

खुला नृत्य तर्फ किरण तिवारी प्रथम, सभ्या भुसाल द्वितीय र सोनिया गुरुङ तृतीय भएका थिए । उनीहरुले क्रमशः प्रथम पुरस्कार नगद २ हजार रुपैयाँ, द्वितीय पुरस्कार नगद १ हजार ५ सय रुपैयाँ र तृतीय पुरस्कार नगद १ हजार रुपैयाँ प्राप्त गरेका थिए । खुल्ला नृत्य प्रतियोगितातर्फ ५ जना सहभागी रहेका थिए ।

प्रतियोगिताको उदघाटन समारोहमा संस्थाका उपाध्यक्ष गीता भुसालले स्वागत मन्तव्य राख्नुभएको थियो भने कार्यक्रमको संचालन संस्थाका सचिव गंगा भट्टराईले गर्नुभएको थियो ।

Write your Comment