सेभेन ए साइड फुटबल प्रतियोगिता : बिहीबार भानु युथ र भेडाबारी फुटबल क्लब विजयी

देवचुली । देवचुली नगरपालिकामा संचालित दोस्रो सेभेन ए साइड फुटबल प्रतियोगितामा बिहीबार भानु युथ क्लब कावासोती र भेडाबारी फुटबल क्लब विजयी भएका छन् । हरितालिका तीजको अवसरमा प्रगतिकला मन्दिर युवा क्लबको आयोजनामा जन ज्योति नमुना माविको खेलमैदानमा भानु युथ क्लब र युथ युनियन देवचुली बीच भएको पहिलो खेलमा भानु युथ क्लब विजयी हुँदै दोस्रो चरणमा प्रवेश गरेको हो । खेलमा भानु युथ क्लबले युथ युनियनलाई २-१ गोल अन्तरले हराएको हो । खेलमा भानु युथ क्लब क्लबका विमज मगरले २ गोल गरेका थिए भने युथ युनियनका दिपिन रानाले १ गोल गरेका थिए ।

बिहीबार नै भएको देवचुली युथ क्लब दलदलेका विरुद्ध भेडाबारी फुटबल क्लब बिचको खेलमा भेडाबारी फुटबल क्लब विजयी भएको छ । भेडाबारी फुटबल क्लबले देवचुली युथ क्लबलाई ट्राइबेकरमा ६-५ गोल अन्तरले हराउँदै दोस्रो चरणमा प्रवेश गरेको हो । दोस्रो खेलको निर्धारित समयको खेलमा दुवै टिमबाट १/१ गोल भएसँगै खेल ट्राइबेकरमा गएको थियो । निर्धारित समयको खेलमा भेडाबारी फुटबल क्लबका महेश मगरले गोल गरेका थिए भने देवचुली युथ क्लबका चेतन रानाले गोल गरेका थिए ।

प्रतियोगितामा प्रथम हुने टिमले ४७ हजार रुपैयाँ नगद सहित मेडल, ट्रफी र प्रमाणपत्र प्राप्त गर्नेछ भने दोस्रो हुने टिमले २६ हजार रुपैयाँ नगद सहित मेडल, ट्रफी र प्रमाणपत्र प्राप्त गर्नेछ। त्यसै गरि प्रतियोगिताको उत्कृष्ट खेलाडी, सर्वाधिक गोलकर्ता र सर्वोकृष्ट गोलरक्षकलाई पुरस्कारको व्यवस्था रहेको छ ।

प्रतियोगिता अन्तरगत शुक्रबार आयोजक निलोका विरुद्ध कावासोती-१५ गोडारबीच पहिलो खेल र अभिषेक चर्च रजहरका विरुद्ध भुपू ब्वाइजबिच हुने आयोजकले जनाएको छ ।