आज: २०८२ भाद्र १४, शनिबार | Sat, 30, Aug, 2025 Search
देवचुली । देवचुली नगरपालिकामा संचालित दोस्रो सेभेन ए साइड फुटबल प्रतियोगितामा शनिबार सनलाइट युवा क्लब, प्रगतिकला मन्दिर युवा क्लब र फाराम खेलकुद विकास समिति विजयी भएका छन् । हरितालिका तीजको अवसरमा प्रगतिकला मन्दिर युवा क्लबको आयोजनामा जन ज्योति नमुना माविको खेलमैदानमा सनलाइट युवा क्लब र फ्युचर क्लब हात्तिखोर बीच भएको पहिलो खेलमा सनलाइट युवा क्लब विजयी हुँदै दोस्रो चरणमा प्रवेश गरेको हो । खेलमा सनलाइट युवा क्लबले फ्युचर क्लबलाई ट्राइबेकरमा ७-६ गोल अन्तरले हराएको हो ।
शनिबार भएको प्रगतिकला मन्दिर युवा क्लबका विरुद्ध बिहानी स्टार बिचको खेलमा प्रगतिकला मन्दिर युवा क्लब विजयी भएको छ । प्रगतिकला मन्दिर युवा क्लबले बिहानी स्टारलाई ट्राइबेकरमा ३-२ गोल अन्तरले हराउँदै तेस्रो चरणमा प्रवेश गरेको हो । शनिबार नै भएको फाराम खेलकुद विकास समितिका विरुद्ध ब्रदर्श स्पोर्ट्सबिचको खेलमा फाराम खेलकुद विकास समिति विजयी भएको छ । फाराम खेलकुद विकास समितिले ब्रदर्श स्पोर्ट्सलाई १-० गोल अन्तरले हराउँदै तेस्रो चरणमा प्रवेश गरेको हो ।
प्रतियोगितामा प्रथम हुने टिमले ४७ हजार रुपैयाँ नगद सहित मेडल, ट्रफी र प्रमाणपत्र प्राप्त गर्नेछ भने दोस्रो हुने टिमले २६ हजार रुपैयाँ नगद सहित मेडल, ट्रफी र प्रमाणपत्र प्राप्त गर्नेछ। त्यसै गरि प्रतियोगिताको उत्कृष्ट खेलाडी, सर्वाधिक गोलकर्ता र सर्वोकृष्ट गोलरक्षकलाई पुरस्कारको व्यवस्था रहेको छ ।
