छोरी सशक्त हुँदा समाज अगाडि बढ्छ : पूर्व सांसद महत

नवलपुर । समाजको अग्रगामी विकास छोरीहरुको सशक्तीकरणसँग प्रत्यक्ष सम्बन्धित रहेको नेकपा एमालेका केन्द्रीय सदस्यीय तथा पुर्व सांसद तिलक महतले बताएका छन् । जागृति बाल तथा युवा सरोकार नेपालले मध्यविन्दु नगरपालिकामा आयोजना गरेको “समानता, सशक्तीकरण र सफलताको आदानप्रदान” कार्यक्रममा  बोल्दै महतले गणतन्त्र पछि पनि महिलामाथि हुने हिंसा, शोषण र असमानता दुखद रहेको बताए । “आजका छोरीहरुमा लगानी गरेर मात्र यस्ता क्रियाकलापलाई अन्त्य गर्न सकिन्छ,” उनले भने ।

संविधानसभा सदस्य कृष्ण पौडेलले आत्मविश्वास र जिम्मेवारीसहित काम गर्ने संस्कार विकास गर्नुपर्नेमा जोड दिए । उनले संविधानको कार्यान्वयनमा सबै मिलेर खबरदारी र आवाज बुलन्द गर्नुपर्ने धारणा राखे । कार्यक्रममा मध्यविन्दु नगरपालिकाका प्रमुख भिमलाल अधिकारीले स्थानीय सरकारको प्राथमिकतामा महिला, बालबालिका र अल्पसंख्यक समुदाय रहेको उल्लेख गर्दै, “नगरपालिका सशक्तीकरण र समानताका लागि सदैव साथमा रहने बताए ।

किशोरी अभियन्ता कोपिला महत्तोले आत्मरक्षा, नेतृत्व विकास, महिनावारी सरसफाइ, वातावरण संरक्षणजस्ता सीप सिकेर आफूमा आएको परिवर्तनको अनुभव सुनाइन् । उनले मानसिक स्वास्थ्य र ‘खुसी पाठ्यक्रम’ माथिल्लो कक्षामा पनि विस्तार गर्नुपर्ने सुझाव दिइन् । त्यस्तै अभियन्ता अनिसा पौडेलले छोरीहरुलाई सपना देख्ने वातावरण सिर्जना भए मात्र समाजमा वास्तविक समानता सम्भव हुने धारणा बताईन ।

संस्थाका महासचिव दिपक शर्माले क्यान्नालनको सहयोगमा किशोरी सशक्तीकरणका विभिन्न कार्यक्रम सञ्चालन भइरहेको जानकारी दिए ।