स्थानीय तह संस्थागत क्षमता स्वमूल्याङकनको नतिजामा देवचुली र कावासोती जिल्ला प्रथम

नवलपुर । नवलपुरको देवचुली र कावासोती नगरपालिका स्थानीय तह संस्थागत क्षमता स्वमूल्याङकन (लिसा) को नतिजामा जिल्लामा उत्कृष्ट भएका छन् । संघीय मामिला तथा सामान्य प्रशासन मन्त्रालयले सार्वजनिक गरेको आर्थिक वर्ष २०८०/०८१ को स्थानीय तह संस्थागत क्षमता स्वमूल्याङकनको गुणस्तर परीक्षणसहितको अन्तिम नतिजा अनुसार जिल्लामा आठ पालिका मध्ये देवचुली र कावासोती सबैभन्दा बढी अङ्क प्राप्त गरेका हुन् ।

देवचुली र कावासोतीले ८६.७५ अङ्कका साथ जिल्लामा प्रथम भएका छन् । नतिजा अनुसार मध्यविन्दु नगरपालिका दोश्रो भएको छ । मध्यविन्दुले ८६.५० अङ्क प्राप्त गरेको छ । यसैगरी हुप्सेकोट गाउँपालिकाले ८६.२५, गैंडाकोट नगरपालिकाले ८४.७५, बौदीकाली गाउँपालिकाले ७९.२५, विनयी त्रिवेणीले ७८.७५ र बुलिङटार गाउँपालिकाले ७६.७५ अङ्क प्राप्त गरेका छन् । स्थानीय तह संस्थागत क्षमता स्वमूल्याङकनमा देवचुली र कावासोती गण्डकी प्रदेशमा छैटौं स्थान हासिल गरेका छन् ।

स्थानीय तह संस्थागत क्षमता स्वमूल्याङ्कन कार्यविधि, २०७७ ले स्थानीय तहको संस्थागत क्षमता स्वमूल्याङ्कनका लागि विभिन्न विषयक्षेत्रहरु निर्धारण गरेको छ । शासकीय प्रबन्ध, सङ्गठन तथा प्रशासन, वार्षिक बजेट तथा योजनामा व्यवस्थापन, वित्तीय र आर्थिक व्यवस्थापन, सेवा प्रवाह, सहकार्य र समन्वय, न्यायिक कार्य सम्पादन, भौतिक पूर्वाधार, सामाजिक समावेशीकरण र वातावरण संरक्षण तथा विपद् व्यवस्थापनन गरी १० शीर्षकमा स्थानीय तहको स्वमूल्याङ्कन हुने गरेको छ ।

गाउँ तथा नगरपालिकाको कार्यप्रक्रिया र उपलब्धिहरुको लेखाजोखा गरि शासकिय प्रक्रिया र विकास व्यवस्थापनमा गर्नुपर्ने सुधारका क्षेत्रहरु पहिचान गर्ने, आवधिक समिक्षाको आधार प्राप्त गर्ने र स्थानीय सरकार बिच स्वस्थ प्रतिस्पर्धाको भावना जागृत गराउने उद्देश्यले संघीय मामिला तथा सामान्य प्रशासन मन्त्रालयले स्थानीय तह संस्थागत क्षमता स्वमूल्याङकन गर्ने गर्दछ ।