दलदलेमा डा. हरि भुसाल ( बिहानी) ट्रष्टको कार्यालय समुदघाटन

देवचुली । देवचुली-१३ दलदलेमा डा. हरि भुसाल ( बिहानी) ट्रष्टको कार्यालयको समुद्घाटन गरिएको छ । शिक्षा, स्वास्थ्य लगायत सामाजिक क्षेत्रमा काम गर्ने उद्देश्यले स्थापना भएको ट्रष्टको कार्यालयको देवचुली नगरपालिकाका नगर प्रमुख हरिप्रसाद न्यौपानेले समुदघाटन गर्नुभएको हो ।

नवलपुर र चितवनमा कार्य क्षेत्र रहेर काम गरेका डा. हरि भुसाल प्रमुख संरक्षण रहने गरि संस्थाको स्थापना गरिएको हो । हाल क्यानडामा रहेका भुसालले ट्रष्टमार्फत सामाजिक अभियानहरु संचालन गरिने जानकारी दिनुभयो । समुदायमा समस्यामा परेका बालबालिकाको शिक्षाका लागि छात्रवृत्ति प्रदान गर्ने, समुदायमा स्वास्थ्य सचेतना अभियान संचालन गर्न र सरोकारवालाहरुसँग सहकार्य गर्दै विभिन्न अभियानहरु ट्रष्ट मार्फत संचालन गरिने ट्रष्टका अध्यक्ष जायसोर भुसालले बताउनुभयो ।

डा. हरि भुसाल ( बिहानी) ट्रष्टका अध्यक्ष जायसोर भुसालको अध्यक्षतामा भएको कार्यालय समुदघाटन कार्यक्रममा देवचुली नगरपालिकाका नगर प्रमुख हरिप्रसाद न्यौपानेको प्रमुख आतिथ्यता रहेको थियो । त्यसै गरि देवचुली नगरपालिका विभिन्न वडाका वडा अध्यक्षहरु, विभिन्न संघसंस्थाका प्रतिनिधि लगायत ट्रष्टका पदाधिकारीहरुको उपस्थिति रहेको थियो ।

कार्यक्रममा बोल्दै नगर प्रमुख न्यौपानेले सामाजिक कार्य गर्न स्थापना भएको ट्रष्टको उद्देश्य अनुसार कार्य सफलताको शुभकामना दिनुभएको थियो । देवचुली नगरपालिकाले ट्रष्टसँग सहकार्यमा काम गर्न सकिने बताउनुभयो । शिक्षा, स्वास्थ्य क्षेत्रमा सरोकारवाला सबैले सहकार्यमा काम गर्न आवश्यक रहेको कुरामा उहाँले जोड दिनुभयो ।

ट्रष्टको कार्यालय समुदघाटन सँगै देवचुली नगरपालिकाका वडा कार्यालयहरूलाई सरसफाई सामग्री समेत वितरण गरिएको हो । ट्रष्टका उपाध्यक्ष पशुपति भुसालको स्वागत मन्तव्य रहेको कार्यक्रमको सहजीकरण ट्रष्टका सचिव अग्निधर भुसालले गर्नुभएको थियो ।