आज:  २०८२ भाद्र १४, शनिबार | Sat, 30, Aug, 2025 Search
FLASH NEWS

प्रगतिकला मन्दिर युवा क्लबको खुला तीजगीत प्रतियोगितामा राधा कृष्ण मन्दिर समिति प्रथम

    प्रकाशित २०८२ भाद्र ११, बुधबार (२ दिन अघि)


देवचुली । देवचुली १४ मा संचालित खुला तीजगीत प्रतियोगिता सम्पन्न भएको छ । हरितालिका तिजको अवसरमा प्रगतिकला मन्दिर युवा क्लबको आयोजनामा जन ज्योति नमुना माध्यमिक विद्यालयको प्राङ्गणमा मंगलबार तीजगीत प्रतियोगिता गरिएको हो । क्लबद्वारा भाद्र २ गतेदेखि सुरु भइरहेको तीज महोत्सव अन्तर्गत मंगलबार तीजगीत तथा छेलो फाल्ने प्रतियोगिता गरिएको हो ।


प्रतियोगितामा देवचुली ५ को राधा कृष्ण मन्दिर समितिले प्रथम स्थान हासिल गरेको छ । त्यसै गरि हरियाली आमा समुह, देवचुली-१२ ले द्वितीय, पाण्डे परिवार समूह, देवचुली १० ले तृतीय र देवचुली ७ को जनविकास आमा समूहले सान्त्वना स्थान हासिल गर्न सफल भएका छन् । बिजेता समुहरुले क्रमशः प्रथम पुरस्कार नगद १५ हजार रुपैयाँ, द्वितीय पुरस्कार नगद ७ हजार ५ सय रुपैयाँ, तृतीय पुरस्कार नगद ३ हजार रुपैयाँ र सान्त्वना पुरस्कार नगद २ हजार रुपैयाँ सहित प्रमाणपत्र प्राप्त गरेका थिए । प्रतियोगितामा ४ वटा समुहको सहभागिता रहेको थियो ।

त्यसै गरि छेलो फाल्ने प्रतियोगिता अन्तर्गत पुरुषतर्फ देवचुली ७ का कृष्णबहादुर बिक प्रथम भएका छन् भने देवचुली ७ कै दिपक बिक द्वितीय भएका छन् । महिलातर्फ देवचुली १४ की पुर्णिमा अधिकारी प्रथम भएकी छन् भने देवचुली ११ का लक्ष्मी कार्की र रुपा थापा द्वितीय भएका छन् । प्रतियोगिताको बिजेताहरुलाई नगद पुरस्कार प्रदान गरिएको थियो ।


प्रगतिकला मन्दिर युवा क्लबका वरिष्ठ उपाध्यक्ष ठाकुरप्रसाद न्यौपानेको अध्यक्षतामा भएको तीज गीत प्रतियोगितामा देवचुली नगरपालिकाका नगर प्रमुख हरिप्रसाद न्यौपानेको प्रमुख आतिथ्यता रहेको थियो । त्यसै गरि देवचुली १० का वडा अध्यक्ष रेप्तीकुमार घर्ती मगर, देवचुली १६ का वडा अध्यक्ष केशवराज गौतम, राजनीतिक पार्टीका प्रतिनिधि, विभिन्न सहयोगी संघसंस्थाका प्रतिनिधि लगायत स्थानीयको उपस्थिति रहेको थियो ।

प्रगतिकला मन्दिर युवा क्लबका सल्लाहकार कमला भण्डारीले स्वागत गरेको प्रतियोगिताको संचालन राकेश विश्ककर्माले गरेका थिए । तीज महोत्सव अन्तर्गत क्लब भाद्र २ गतेदेखि फुटबल प्रतियोगिता संचालन भइरहेको छ । फुटबल प्रतियोगिताका बाँकी खेलहरु सुचारु रहेको क्लबले जनाएको छ ।

Write your Comment