सेभेन ए साइड फुटबल प्रतियोगिता : सनलाइट युवा क्लब र देवचुली-११ सेमिफाइनल प्रवेश

देवचुली । देवचुली नगरपालिकामा संचालित दोस्रो सेभेन ए साइड फुटबल प्रतियोगितामा बुधबार सनलाइट युवा क्लब र देवचुली-११ सेमिफाइनल प्रवेश गरेका छन् । हरितालिका तीजको अवसरमा प्रगतिकला मन्दिर युवा क्लबको आयोजनामा जन ज्योति नमुना माविको खेलमैदानमा भएको सनलाइट युवा क्लब र भुपु ब्वाइजका बीच भएको खेलमा सनलाइट युवा क्लब विजयी हुँदै सेमिफाइनल प्रवेश गरेको हो । खेलमा सनलाइट युवा क्लबले भुपु ब्वाइजलाई २-० गोल अन्तरले हराएको हो । खेलमा सनलाइट युवा क्लबका तर्फबाट विक्रम लामा र विवेक मगरले १/१ गोल गरेका थिए। खेलमा सनलाइट युवा क्लबका विक्रम लामा म्याच अफ दि म्याच भएका थिए ।

बुधबार नै भएको प्रगतिकला मन्दिर युवा क्लब निलोका विरुद्ध देवचुली-११ बिचको खेलमा देवचुली-११ विजयी भएको छ । देवचुली-११ ले आयोजक निलोलाई ३-० गोल अन्तरले हराउँदै सेमिफाइनल प्रवेश गरेको हो । खेलमा देवचुली-११ का रोहन पुलामीले २ गोल र प्रितम राईले १ गोल गरेका थिए । दोस्रो खेलमा देवचुली-११ का रोहन पुलामी म्यान अफ दि म्याच भएका थिए ।

प्रतियोगितामा प्रथम हुने टिमले ४७ हजार रुपैयाँ नगद सहित मेडल, ट्रफी र प्रमाणपत्र प्राप्त गर्नेछ भने दोस्रो हुने टिमले २६ हजार रुपैयाँ नगद सहित मेडल, ट्रफी र प्रमाणपत्र प्राप्त गर्नेछ। त्यसै गरि प्रतियोगिताको उत्कृष्ट खेलाडी, सर्वाधिक गोलकर्ता र सर्वोकृष्ट गोलरक्षकलाई पुरस्कारको व्यवस्था रहेको छ ।

प्रतियोगिता अन्तरगत शुक्रबार नव ज्योति युवा क्लबका विरुद्ध प्रगतिकला मन्दिर युवा क्लब र सनलाइट युवा क्लबका विरुद्ध देवचुली-११ बिच सेमिफाइनलका खेल हुने आयोजकले जनाएको छ ।