कावासोतीमा फिफाको नियमसम्बन्धि रिफ्रेसर तालिम सुरु

कावासोती । कावासोती नगरपालिकामा फिफाको नियमसम्बन्धि रिफ्रेसर तालिम सुरु भएको छ । कावासोती नगर खेलकुद विकास समितिको आयोजना र  नवलपुर जिल्ला फुटबल संघको समन्वयमा सोमबारबाट नवलपुर जिल्लामा फुटबलका रेफ्रीहरुको क्षमता विकासको लागि दुई दिनको तालिम सुरु गरिएको हो ।

कावासोती नगर खेलकुद विकास समितिका अध्यक्ष ध्रुव खनाल(दिपेश) को अध्यक्षतामा भएको तालिमको उद्घाटन कार्यक्रममा  कावासोती नगरपालिकाका नगर प्रमुख बिष्णुप्रसाद भुसालको प्रमुख आतिथ्यता रहेको थियो । त्यसै गरि कार्यक्रममा नगर उप प्रमुख फुलकुमारी थनेत, नगर शिक्षा अधिकारी हेमचन्द्र पौडेल , जिल्ला खेलकुद विकास समिति नवलपुरका अध्यक्ष सेतमान पुन, जिल्ला फुटबल संघका कार्यवाहक अध्यक्ष मेघराज पान्डे लगायतको उपस्थिति रहेको थियो ।

जिल्ला विभिन्न स्थानमा संचालन हुने खेलहरुलाई विवादरहित र फिफाको नियमअनुसार संचालन गर्नका लागि रेफ्रीहरुलाई दुई दिनसम्म रिफ्रेसर तालिम सुरु गरिएको कावासोती नगर खेलकुद विकास समितिका अध्यक्ष ध्रुव खनाल(दिपेश) जानकारी दिनुभयो । तालिममा जिल्लामा फुटबल खेल खेलाउने रेफ्रीहरुको सहभागिता रहेको र रेफ्री प्रशिक्षक विरेन्द्र पान्डेले सहजीकरण गर्नुहुने उहाँले  बताउनुभयो ।

तालिमको उदघाटन सत्रमा बोल्नुहुँदै प्रमुख अतिथि नगर प्रमुख भुसालले दुई दिनसम्म संचालन हुने तालिमको सक्दो सदुपयोग गर्न सहभागिलाई आग्रह गर्नुभएको थियो । उहाँले जिल्लामा संचालन हुने हरेक स्तरका खेलमा मर्यादित र विवादरहित बनाउन रेफ्रीहरुको भुमिका पनि रहने बताउँदै खेलका आवश्यक नियमहरुको बारेमा  सदैव ध्यान दिनुपर्ने बताउनुभयो । त्यसै गरि कार्यक्रममा बोल्ने वक्ताहरुले तालिम सफलताको शुभकामना व्यक्त गर्नुभएको थियो ।