सेभेन ए साइड फुटबल प्रतियोगिता : देवचुली-११ र प्रगतिकला मन्दिर युवा क्लब फाइनल प्रवेश

देवचुली । देवचुली नगरपालिकामा संचालित दोस्रो सेभेन ए साइड फुटबल प्रतियोगितामा देवचुली-११ र प्रगतिकला मन्दिर युवा क्लब फाइनल प्रवेश गरेका छन् । हरितालिका तीजको अवसरमा प्रगतिकला मन्दिर युवा क्लबको आयोजनामा जन ज्योति नमुना माविको खेलमैदानमा नव ज्योति युवा क्लबका विरुद्ध देवचुली-११ का बीच भएको पहिलो सेमिफाइनल खेलमा विजयी हुँदै देवचुली-११ फाइनल प्रवेश गरेको हो । खेलमा देवचुली-११ ले नव ज्योतिलाई २-१ गोल अन्तरले हराएको हो । खेलमा देवचुली-११ का तर्फबाट गणेश हमाल र समीप ढकालले १/१ गोल गरेका थिए भने नव ज्योति युवा क्लबका नवीन महतोले गोल गरेका थिए । पहिलो सेमिफाइनल खेलमा देवचुली-११ का गणेश हमाल म्याच अफ दि म्याच भएका थिए ।

शुक्रबार नै भएको प्रगतिकला मन्दिर युवा क्लबका विरुद्ध सनलाइट युवा क्लब बिचको दोस्रो सेमिफाइनल खेलमा प्रगतिकला मन्दिर युवा क्लब विजयी भएको छ । प्रगतिकला मन्दिर युवा क्लबले सनलाइटलाई ट्राइबेकरमा ३-१ गोल अन्तरले हराउँदै फाइनल प्रवेश गरेको हो । निर्धारित समयको खेलमा दुवै टिमबाट २-२ को बराबरी भएपछि खेल ट्राइबेकरमा गएको थियो । निर्धारित समयको खेलमा प्रगतिकला मन्दिर युवा क्लबका नवीन मगरले २ गोल गरेका थिए भने सनलाइट युवा क्लबका सबिन बोटेले २ गोल गरेका थिए । दोस्रो सेमिफाइनल खेलमा प्रगतिकला मन्दिर युवा क्लबका विशाल बिक म्यान अफ दि म्याच भएका थिए ।

प्रतियोगितामा प्रथम हुने टिमले ४७ हजार रुपैयाँ नगद सहित मेडल, ट्रफी र प्रमाणपत्र प्राप्त गर्नेछ भने दोस्रो हुने टिमले २६ हजार रुपैयाँ नगद सहित मेडल, ट्रफी र प्रमाणपत्र प्राप्त गर्नेछ। त्यसै गरि प्रतियोगिताको उत्कृष्ट खेलाडी, सर्वाधिक गोलकर्ता र सर्वोकृष्ट गोलरक्षकलाई पुरस्कारको व्यवस्था रहेको छ । प्रतियोगिता अन्तरगत शनिबार प्रगतिकला मन्दिर युवा क्लबका विरुद्ध देवचुली-११ बिच फाइनलका खेल हुने आयोजकले जनाएको छ ।