मध्यविन्दुमा महिनावारी सरसफाई र पुन प्रयोग योग्य प्याड निर्माण कार्यशाला सम्पन्न

चोरमारा । मध्यविन्दु नगरपालिकामा किशोरीहरुको लागि यौन तथा प्रजनन स्वास्थ्य, महिनावारी सरसफाई तथा स्वच्छता र घरमा नै निर्माण गर्न सकीने पुन प्रयोगगर्न सकीने प्याड बनाउने तालिम मध्यविन्दु नगरपालिकामा सम्पन्न गरिएको छ । मध्यविन्दु नगरपालिकामा जागृति बाल तथा युवा सरोकार नेपालले क्यान्नालनसँगको साझेदारीमा सञ्चालित किशोरी शसक्तिकरण कार्यक्रम अन्तर्गतका ३० जना साथी शिक्षकहरुलाई सो तालिम सञ्चालन गरिएको जागृति बाल तथा युवा सरोकार नेपालका कार्यक्रम अधिकृत राधादेवी बोटेले बताउनुभयो ।

किशोरी शसक्तिकरण कार्यक्रम अन्तर्गत छनौट भएका किशोरीहरुलाई विभिन्न विषयहरुमा विभिन्न चरणहरुको तालिम प्रदान गरी उनीहरुको मार्फतबाट विद्यालय र समुदायस्तरमा उनीहरुले लिएका तालिमको विषयमा सिकाउने र छलफल गर्ने साथीबाट साथी अवधारणाका साथ विगत १ वर्षदेखि मध्यविन्दुमा सञ्चालन गरिरहेको संस्थाका महासचिव दिपक शर्माले बताउनुभयो । उनीहरुले आत्म सुरक्षा, नेतृत्व विकास, हिंसा, शोषण र दृव्र्यवहारबाट बच्ने उपायहरु, बाल अधिकार, किशोरी अधिकार, द्धन्द्धको समाधान सम्बन्धी जीवनउपयोगी सिपका तालिमहरु सञ्चालन गरेको उहाँले बताउनुभयो ।

आजको कार्यक्रममा प्रदेश जनस्वास्थ्य कार्यालय नवलपुरका परिवार योजना तथा किशोरकिशोरी स्वास्थ्य कार्यक्रमको फोकल पर्सन सागर पराजुलीले यौन तथा प्रजनन स्वास्थ्य, पोषण, महिनावारी सरसफाई तथा स्वच्छताको बारेमा सहजिकरण गर्नुभएको थियो । किशोर अवस्थामा हुने परिवर्तनलाई आत्मसात गर्दै आफुमा आउने परिवर्तनहरुको बारेमा समेत जानकारीहरु हासिल गर्न सकियो भने सबै हिसाबले अब्बल हुन सकिनेमा उहाँले जोड दिनुभयो । महिनावारीको बेलामा सरसफाईको विशेष महत्व हुने गरेको र हाम्रोमा अझै पनि यसको बारेमा खुलेर चर्चा नगरिनुले समस्या भएकोले किशोरीहरुले यसको बारेमा खुलेर चर्चा गर्नको लागि विभिन्न टिप्सहरु समेत दिनुभयो । किशोर अवस्थामा खानपानको विशेष महत्व हुने भएकोले पोष्टिकयुक्त खानेकुराहरु बढी मात्रामा खानुपर्ने र जंकफुडहरुको कम प्रयोग गर्नको लागि उत्प्रेरित समेत गर्नुभयो ।

किशोरी अभियन्ता आशा विकले सेनेटरी प्याडको महत्व र यसको प्रयोगको विधिको बारेमा जानकारी दिँदै बजारीया प्याडको फाईदा र बेफाईदासँगै पुन प्रयोग योग्य प्याडको फाईदा र बेफाईदाको बारेमा सहजिकरण गर्नुभएको थियो । साथै घरमा नै सफा कपडाहरुको प्रयोग गरी निर्माण गर्न सकिने प्याडको निर्माणको विधिहरु र तरिकाहरु सिकाउनुभएको थियो ।

कार्यक्रमको समुद्घाटन समारोहमा नगर प्रमुख भिमलाल अधिकारीले किशोरीहरुको शसक्तिकरणको लागि यो तालिम फलदायी रहेको र कुनै पनि हिसाबले किशोरीहरु कमजोर रहेको नसोची आफु र आफ्नो विकासको लागि लाग्न अनुरोध गर्नुभयो । व्यक्तित्व विकाससँगै समाजका हानिकारिक अभ्यासहरु समेत न्युनीकरणमा विद्यालय र समुदायस्तरमा कार्यक्रमहरु सञ्चालन गर्न उहाँले जोड दिनुभयो ।