रजहर खानेपानीको निर्वाचनमा २०९२ मत खस्यो

देवचुली। देवचुली नगरपालिकामा रहेको रजहर खानेपानी तथा सरसफाई उपभोक्ता संस्थाको निर्वाचन सम्पन्न भएको छ । बुधबार वरचुली माध्यमिक विद्यालयको खेल मैदानमा सम्पन्न मतदानमा २ हजार ९२ मत खसेको निर्वाचन संयोजक शिवहरी अधिकारीले जानकारी दिनुभयो ।

संस्थाको निर्वाचनका लागि दुइ हजार आठ सय ५४ मतदाता रहेका थिए । खानेपानी संस्थाको कार्य समितिका चयनका लागि ७३.३० प्रतिशत मतदाताले मतदान गरेका छन् । संस्थाको कार्य समिति चयनका लागि बुधबार बिहान ८:३० बाट सुरु भएको मतदान दिउँसो ४ बजेसम्म संचालन भएको थियो । निर्वाचनको मतगणना केही समयपछि गरिने तयारी गरिएको निर्वाचन समितिले जनाएको छ ।

संस्थाको आगामी अध्यक्ष पदका लागि चार जना प्रतिष्पर्धामा रहेका छन् । अध्यक्षका लागि कृष्णप्रसाद तिवारी, बासुबाबु कोइराला, टेकबहादुर क्षेत्री र गंगाबहादुर थापा प्रतिष्पर्धामा रहेका छन् । निर्वाचनको मतगणनाबाट अध्यक्ष,उपाध्यक्ष, सचिव,सह सचिव , कोषाध्यक्ष, लेखा समिति संयोजक, सदस्यहरू र साविक वडाबाट सदस्यहरु चयन हुनेछन् । साविक रजहर वडा नं २ मा खोरबहादुर थनेत निर्विरोध निर्वाचित भइसकेका छन्।