आज: २०८२ भाद्र १४, शनिबार | Sat, 30, Aug, 2025 Search
नवलपुर। मध्यविन्दु नगरपालिका–१५ स्थित ज्ञानोदय माध्यमिक विद्यालयमा किशोरीहरुलाई लक्षित गरी महिनावारी स्वच्छता तथा पुनःप्रयोग योग्य प्याड बनाउने तालिम सम्पन्न भएको छ । जागृति बाल तथा युवा सरोकार नेपालको आयोजना क्यान्नलानको सहयोग र विद्यालयको समन्वयमा तालिम गरिएको हो ।
जागृति बाल तथा युवा सरोकार नेपालले पालिकासँग समन्वय गरी ३० जना साथी शिक्षकमार्फत विद्यालय र समुदायमा सचेतनामूलक गतिविधि सञ्चालन गर्दै आएको साथै विद्यालयमा किशोरीमैत्री शौचालय मर्मतका लागि पनि सहयोग गरेको कार्यक्रम अधिकृत राधा देवी बोटेले बताइन् ।
विद्यालय बालक्लवकी सचिव स्मारिका महतोको अध्यक्षता, विद्यालय बालक्लव तथा लैंगिक सम्पर्क शिक्षक इनिस महतोको प्रमुख आतिथ्यता र वडा सचिव भोलानाथ आचार्यको विशेष आतिथ्यतामा तालिम सम्पन्न गरिएको थियो । साथी शिक्षक सजिना अधिकारीले तालिम सञ्चालन गरेकी थिइन् भने सितल चौधरीले महिनावारी अघि देखिने लक्षण, खानपान र ध्यान दिनुपर्ने पक्षबारे सहजीकरण गरिन् । त्यस्तै, रितु घर्ती मगरले महिनावारी स्वच्छताको महत्त्व तथा घरायसी र बजारमा पाइने प्याडको फाइदा–बेफाइदाबारे जानकारी दिइन् । सामाजिक परिचालक रुपा भट्टराई काफ्लेसहित प्रशिक्षकहरूले किशोरीलाई कपडाको प्याड बनाउने तरिका र सुरक्षित पुनःप्रयोग गर्न सकिने सीप सिकाएका थिए।
तालिममा सहभागी कक्षा ८ की विद्यार्थीनी जानकी चौधरीले कपडाको प्याड बनाउन र सुरक्षित ढंगले प्रयोग गर्न सक्ने सीप सिकेको अनुभव सुनाउँदै अझै पनि कतिपय ठाउँमा कायम रहेको छाउपडी प्रथा अन्त्य गर्न यस्ता कार्यक्रम आवश्यक रहेको धारणा राखिन् । लैंगिक सम्पर्क शिक्षक इनिस महतोले घरमै प्याड बनाउन सक्ने उपायबारे सिकाएकोमा साथी शिक्षकलाई धन्यवाद दिँदै आगामी दिनमा पनि आवश्यक चेतनामूलक कार्यक्रम सञ्चालन गर्न आग्रह गरिन् । तालिमकी अध्यक्ष स्मारिका महतोले विद्यालयमा महत्त्वपूर्ण तालिम आयोजना भएकोमा खुसी व्यक्त गर्दै विद्यालय प्रशासनलाई धन्यवाद दिइन् ।
तालिमको क्रममा विद्यालय व्यवस्थापन समितिका अध्यक्ष बाबुराम पाण्डे, वडा सचिव भोलानाथ आचार्य, विद्यालय स्वास्थ्य सम्पर्क शिक्षक रिना श्रेष्ठ लगायतले अनुगमन तथा अवलोकन गरेका थिए ।
प्रशिक्षकहरूले महिनावारी स्वच्छता केवल स्वास्थ्यसँग सम्बन्धित नभई किशोरीको शिक्षा, आत्मविश्वास र सामाजिक जीवनसँग प्रत्यक्ष जोडिएको बताएका थिए । अस्वच्छ महिनावारी अभ्यासका कारण मूत्राशय, प्रजनन प्रणालीसम्बन्धी रोग र दीर्घकालीन स्वास्थ्य समस्या देखा पर्न सक्ने भएकाले किशोरीमैत्री वातावरण र सचेतनामूलक कार्यक्रमहरू अपरिहार्य रहेको उनीहरूको भनाइ थियो ।
