आज: २०८२ भाद्र १४, शनिबार | Sat, 30, Aug, 2025 Search
नवलपुर । मध्यबिन्दु नगरपालिका वडा नम्बर २ का वडास्तरिय बालक्लबका पदाधिकारी र बालबालिकालाई बाल अधिकार, किशोरी अधिकार तथा बालमैत्री स्थानीय शासनसम्बन्धी अभिमुखीकरण कार्यक्रम सम्पन्न भएको छ । मध्यबिन्दु नगरपालिकामा सञ्चालित किशोरी सशक्तीकरण कार्यक्रम अन्तर्गत जागृती बाल तथा युवा सरोकार नेपालको आयोजना, क्यान्नलानको सहयोग तथा जिल्ला प्रहरी कार्यालय नवलपरासी (ब.सु.पु.) र मध्यविन्दु वडा नं. २ को समन्वयमा कार्यक्रम सम्पन्न गरिएको हो।
कार्यक्रममा संस्थाकी कार्यक्रम अधिकृत राधादेवी बोटेले बालमैत्री स्थानीय शासनको अवधारणा, सूचकहरु, बाल विवाहसम्बन्धी कानुनी व्यवस्था, बाल हिंसा तथा दुर्व्यवहारमा सहयोग प्राप्त गर्न सकिने निकाय र हटलाइन नम्बरबारे सहजीकरण गर्दै जानकारी दिइन् । किशोरी अभियन्ता अनिसा पौडेलले बालबालिका, बाल अधिकारको पृष्ठभूमि, चार आधार स्तम्भ, राम्रो र नराम्रो छुवाइको बारेमा सहजीकरण गरेकी थिइन् । त्यस्तै किशोरी अभियन्ता कोपिला कुमारी महतोले बाल क्लबको टोल, समुदाय र वडामा सन्चालन गर्न सकिने क्रियाकलापहरु, बालक्लबको भुमिका र दायित्वको बारेमा सहजीकरण गरेकी थिइन् ।
वडा बाल संजालका सदस्य संगम घिमिरेले कार्यक्रममा धेरै नयाँ कुरा सिक्न पाएको बताउँदै यस्ता कार्यक्रमले जीवनमा अगाडि बढ्न मार्गदर्शन गर्ने धारणा राखे । उनले बाल हिंसा र बालश्रम नियन्त्रणमा यस्ता कार्यक्रमले महत्त्वपूर्ण योगदान पुर्याउने भएकाले निरन्तर आयोजना गर्नुपर्नेमा जोड दिए।
वडा अध्यक्ष रामभक्त अधिकारीले बालबालिकाले आफ्नो अधिकारसँगै कर्तव्यप्रति पनि सचेत रहनुपर्नेमा जोड दिए। उनले वडाभित्र बाल विवाह र बालबालिकामाथी हुन सक्ने शोषण रोक्न, विपदमा बालबालिका, अशक्त तथा गर्भवती महिलाको सुरक्षाका लागि समयमै सूचना सम्प्रेषण गर्ने जिम्मेवारी सबैले लिनुपर्ने बताए । बालबालिकाले सानैदेखि आत्मबल बढाउनुपर्ने र भविष्यमा वडाबाट देशको नेतृत्व गर्ने अवस्थामा पुग्ने भएकाले सक्रिय हुन आग्रह गरे ।
वडा बाल क्लब संजालका उपाध्यक्ष रिजु अधिकारीले किशोरी अधिकार, बालमैत्री शासन र बाल विवाहजस्ता विषयमा सिक्न पाएकोमा खुशी व्यक्त गर्दै वडास्तरमै यस्ता कार्यक्रम अझै निरन्तर ल्याउनुपर्ने माग वडाअध्यक्षसँग राखिन्। कार्यक्रममा वडास्तरिय बालक्लवकी उपाध्यक्ष रिजु अधिकारीको अध्यक्षता तथा वडा अध्यक्ष रामभक्त अधिकारीको प्रमुख आतिथ्यता रहेको थियो । कार्यक्रममा प्रस्तुतीकरण सहित, खेल, अन्तरक्रिया बिधिबाट गरिएको थियो, जसमा जनप्रतिनिधिहरु सहित ५० जना बालबालिकाको सहभागिता रहेको थियो ।
