आज: २०८२ भाद्र १३, शुक्रबार | Fri, 29, Aug, 2025 Search
देवचुली । देवचुली नगरपालिका वडा नम्बर ५ मा सरसफाइ कार्यक्रम सम्पन्न गरिएको छ । अन्तर्राष्ट्रिय युवा दिवस २०२५ (अगष्ट १२) को अवसरमा वडा युवा तथा खेलकुद विकास समिति, देवचुली-५ को आयोजना तथा देवचुली नगरपालिका युवा तथा खेलकुद विकास समितिको समन्वयमा वडामा रहेको राधाकृष्ण मन्दिर र सकला देवी माध्यमिक विद्यालयमा सरसफाइ गरिएको हो ।
सरसफाइको महत्त्वबारे सचेतना फैलाउने साथै युवा पुस्तालाई सामाजिक सेवामा सक्रिय बन्न प्रेरित गर्ने उद्देश्य कार्यक्रम गरिएको आयोजक समितिकक अध्यक्ष दिलबहादुर गुरुङले जानकारी दिनुभयो । वडामा रहेको राधाकृष्ण मन्दिर र सकलादेवी माध्यमिक विद्यालयमा सरसफाईका क्रममा जम्मा भएका फोहर संकलन गरी उचित व्यवस्थापन गरिएको र फूलबारीका झारपात गोलमेल गरिएको समेत उहाँले बताउनुभयो ।
वडा युवा तथा खेलकुद विकास समिति, देवचुली-५ का अध्यक्ष दिलबहादुर गुरुङको अध्यक्षतामा भएको सरसफाइ कार्यक्रममा देवचुली नगरपालिका वडा नम्बर ५ का वडा अध्यक्ष कृष्णप्रसाद सापकोटा, सकलादेवी माध्यमिक विद्यालयका प्रधानाध्यापक होमनाथ न्यौपाने, नगर युवा तथा खेलकुद विकास समितिका सचिव प्रकाश काफ्ले, स्थानीय युवा, विद्यार्थी, विभिन्न संघसंस्थाका प्रतिनिधि लगायतको सक्रिय सहभागिता रहेको थियो।
“दिगो विकास र सुनौलो भविष्यको सार: स्थानीय युवाको सहभागिता समृद्धको आधार” भन्ने नाराका रहेको अन्तर्राष्ट्रिय युवा दिवस २०२५ को अवसरमा वडा युवा तथा खेलकुद विकास समितिमार्फत वडाहरुमा विभिन्न कार्यक्रम तय गरिएको र साउन २७ गते माध्यमिक तह स्तरीय निबन्ध प्रतियोगिता आयोजना गरिएको देवचुली नगरपालिका युवा तथा खेलकुद विकास समितिले जनाएको छ ।
