आज: २०८२ भाद्र १३, शुक्रबार | Fri, 29, Aug, 2025 Search
नवलपरासी । पश्चिम नवलपरासीको पाल्हिनन्दन गाउँपालिकामा विद्यालय तथा समुदायमा जलवायु परिवर्तन र वातावरण संरक्षण सम्बन्धी सचेतनामुलक कार्यक्रम सम्पन्न गरिएको छ । असल छिमेकी नेपाल पोखराको आयोजनामा सोमबार र मंगलबार कार्यक्रम गरिएको हो ।
असल छिमेकी नेपालद्वारा पाल्हिनन्दन गाउँपालिका संचालन गरिएको सामुदायिक सशक्तीकरण र जिविकोपार्जन परियोजना अन्तरगत सोमबार पाल्हिनन्दन- ५ मा रहेको राजनारायण माविका विद्यार्थीहरुलाई र मंगलबार पाल्हिनन्दन ५ मा रहेको सगरमाथा समूह र तारा समुह साथै पाल्हिनन्दन ६ मा रहेको राजावादी र फुलबारी समुहलाई जलवायु परिवर्तन र वातावरण संरक्षण सम्बन्धि सचेतनामुलक कार्यक्रम गरिएको संस्थाका परियोजना संयोजक पुरन सोतीले जानकारी दिनुभयो । संस्थाले पाल्हिनन्दन गाउँपालिकासँग समन्वय गरेर विभिन्न सचेतनामुलक कार्यक्रम संचालन गरिरहेको उहाँले बताउनुभयो ।
कार्यक्रमलाई सहजीकरण गर्दै सहजकर्ता राजु चापागाई र दिपक शर्माले जलवायु परिवर्तनका कारण देखिएका वर्तमान चुनौतीहरूबारे प्रस्ट पार्दै हरितगृह ग्यासको असर, वन विनाश, प्लास्टिक प्रदूषण लगायतका विषयमा सहजीकरण गर्नुभएको थियो। उहाँहरुले वातावरण संरक्षणका लागि दैनिक जीवनशैलीमा अपनाउन सकिने व्यवहारिक उपायहरू पनि सुझाउनु भएको थियो ।
कार्यक्रममा सहभागीहरूलाई वृक्षारोपण अभ्यास, पुनः प्रयोग तथा रिसाइकल गर्ने तरिका, प्लास्टिक न्यूनीकरण अभियान र स्वच्छ वातावरणको आवश्यकता विषयमा छलफल गराइएको थियो। समुदायमा भएको कार्यक्रममा महिलाहरुले सामुहिक सरसफाइ कार्यक्रम संचालन गर्ने, शौचालय नभएका घरहरुलाई शौचालय निर्माणका लागि पहल गर्ने, खुल्ला दिशामुक्त टोल निर्माण गर्ने र घरबाट निस्कने फोहोरलाई जथाभावी नफाली निश्चित ठाउँमा व्यवस्थापन गर्ने, नालीको सरसफाइमा ध्यान दिने छलफल भएको थियो ।
कार्यक्रममा राजनारायण माविका २०० जना विद्यार्थी र समुदायका १२० महिलाहरुलाई सचेतनामुलक कार्यक्रम गरिएको छ । उक्त कार्यक्रममा असल छिमेकी संस्थाबाट गौरव महतो, पुष्पा चौधरी, विद्यालयका शिक्षकहरु, समुदायका अग्रज महिलाहरु लगायतको सहभागिता रहेको थियो ।
