देवचुलीमा सोलार ब्याट्री चोरीमा संलग्न तीन जना पक्राउ

देवचुली । देवचुली नगरपालिका–१५ प्रगतिनगरस्थित सडक छेउमा राखिएको सोलार पोलबाट ब्याट्री चोरी गर्ने क्रममा तीन जना व्यक्तिहरूलाई प्रहरीले नियन्त्रणमा लिएको छ। आईतवार दिउँसो करिब १ बजे प्राप्त गोप्य सूचनाका आधारमा प्रहरी टोली घटनास्थलमा पुगेर चोरीमा संलग्न भनिएका तीन जनालाई ना १ ह ३३३६ नम्बरको मयुर गाडी सहित नियन्त्रणमा लिएको हो।

पक्राउ परेकाहरूमा चितवन कालिका नगरपालिका–९ शक्तिखोरका ३४ वर्षीय भीम बहादुर प्रजा, इच्छाकामना गाउँपालिका–७ का २७ वर्षीय डम्बर चेपाङ र ३१ वर्षीय पप्पु चेपाङ रहेका छन्। प्रारम्भिक अनुसन्धानमा उनीहरूले यही साउन १६ र १७ गते पनि सोही क्षेत्रका सोलार पोलबाट ब्याट्री झिकेर लगेको स्वीकार गरेका छन्। उनीहरूले देवचुली नगरपालिका–१० को पोलबाट समेत ब्याट्री चोरेको खुलेको छ।