देवचुलीका सुनिल र रमेश `फिने´ गण्डकी प्रदेशको उपाध्यक्ष र सदस्यमा चयन

नवलपुर । गण्डकी प्रदेशमा अन्तर्राष्ट्रिय नेपाली युवा समाज (फिने) गठन गरिएको छ। शनिबार पोखरामा भएको युवा उद्यमीहरूको भेलाले जितु गुरुङको नेतृत्वमा १९ सदस्यीय फिने गण्डकी प्रदेशको कार्य समिति गठन गरिएको हो। फिने गण्डकी प्रदेश कमिटीमा देवचुली नगरपालिकाबाट सुनिल न्यौपाने उपाध्यक्षमा चयन भएका छन् भने रमेश प्रसाद भुर्तेल कार्यसमिति सदस्यमा चयन भएका छन् ।

यसैगरी फिने गण्डकीको वरिष्ठ उपाध्यक्षमा हरि भुजेल, उपाध्यक्षमा सुनिल न्यौपानेसँगै शान्ति श्रेष्ठ उदास, महासचिवमा चिरञ्जीवी गौतम, सचिवमा प्रसिद्ध भण्डारी र राजकुमार सुनार कोषाध्यक्षमा पोषराज पौडेल, सह कोषाध्यक्षमा रुद्र रेग्मी र प्रवक्तामा कृष्णप्रसाद आचार्य चयन भएका छन् । समितिको सदस्यमा रमेश प्रसाद भुर्तेलसँगै अस्मिता लामिछाने भूपेन्द्रकुमार लामा हरि लामिछाने गोपालकृष्ण संग्रौला धर्मराज पन्थी थानेश्वर बराल, सन्तोष प्रधान र सुरेन्द्र कुँवर रहेका छन् ।

गण्डकी प्रदेशका मुख्यमन्त्री सुरेन्द्रराज पाण्डेले भेलाको उद्घाटन गरेका थिए । भेलाको उद्घाटन गर्दै मुख्यमन्त्री पाण्डेले विदेशमा श्रम, सीप र परिश्रमको थोरै भए पनि हिस्सा नेपालमा लगानी गर्न अनुरोध गर्दै गण्डकीको कानुनले रोकेको भए आफू संशोधन गर्न र बाटो सहज बनाउन तयार रहेको बताए ।

नव गठित फिने गण्डकीका उपाध्यक्ष भएका सुनिल न्यौपानेले देवचुली १३ मा सुप्रिम प्याकेजिङ उद्योगको स्थापना गरेर सञ्चालनमा ल्याएका छन् भने कार्यसमिति सदस्य भएका रमेश प्रसाद भुर्तेलले देवचुली १३ दलदलेमा राम स्टेसनरी एण्ड स्पोर्ट्स संचालनका साथै शैक्षिक व्यवसायमा संलग्न छन् । न्यौपाने र भुर्तेलले स्थानीय उत्पादन प्रवर्द्धन, उद्यमशीलता विकास र युवाहरुलाई स्वरोजगारतर्फ उन्मुख गराउने साझा उद्देश्यमा समर्पित भएर काम गर्ने बताउनुभयो । “सशक्त युवा, समृद्ध राष्ट्र” भन्ने मुलमन्त्रलाई आत्मसात गर्दै गण्डकीमा उद्यमशीलताको नयाँ युग सुरु गर्न सबैको हातेमालो हुन आवश्यक रहेको उहाँहरुको भनाई छ ।

विश्वका विभिन्न मुलुकमा छरिएर रहेका युवा उद्यमीलाई समेटेर स्थापना गरिएको फिनेले नेपाली उत्पादनलाई विदेशमा ब्रान्डिङ गर्ने उद्देश्यसहित प्रदर्शनी, बजारीकरणलगायत विषयमा सहजीकरण गर्ने र देशविदेशमा रहेका युवा उद्यमीलाई जोड्ने लक्ष्य लिएको छ ।