नाइन ‘ए’ साइड भेट्रान्स फुटबल : मंगलबार देवचुली १४ विजयी

देवचुली । देवचुली नगरपालिका वडा नम्बर ११ मा संचालित वडा स्तरीय नाइन ‘ए’ साइड भेट्रान्स फुटबल प्रतियोगितामा मंगलबार देवचुली १४ विजयी भएको छ । बैशाख पुर्णिमा अर्थात बुद्ध जयन्तीको अवसरमा वडा युवा तथा खेलकुद विकास समिति देवचुली ११ को आयोजना तथा पृथ्वी समाज सेवा क्लबको सह-आयोजनामा सुर्य किरण आधारभूत विद्यालयको खेल मैदानमा भएको प्रतियोगिता अन्तरगत मंगलबार देवचुली १४ ले देवचुली ९ लाई हराएको हो ।

खेलमा देवचुली १४ ले देवचुली ९ लाई ७-० गोल अन्तरले हराउँदै दोस्रो चरणमा प्रवेश गरेको हो । खेलमा देवचुली १४ का नवराज बसेल महतो म्यान अफ दि म्याच भएका थिए ।

देवचुली नगरपालिकाका ३५ वर्ष उमेर पूरा भएका खेलाडीहरु सहभागी हुन पाउने प्रतियोगितामा १७ टिमको सहभागिता रहेको छ । प्रतियोगितामा प्रथम हुने वडाले नगद ४० हजार १ सय ११ रुपैयाँसहित मेडल,प्रमाणपत्र र ट्रफी प्राप्त गर्नेछ भने उपबिजेता हुने वडाले नगद २० हजार १ सय ४१ रुपैयाँसहित मेडल,प्रमाणपत्र र ट्रफी प्राप्त गर्नेछ।

प्रतियोगितामा प्रत्येक दिनको उत्कृष्ट खेलाडीलाई पुरस्कारको व्यवस्था रहेको आयोजकले जनाएको छ । प्रतियोगिता अन्तर्गत बुधबार देवचुली ३ का विरुद्ध देवचुली १३ बिच खेल हुने खेल संयोजक कृष्ण ठाडाले जानकारी दिए ।