राइनो गोल्डकप : सेन्टर कलेज फोर ब्रदर भुमही विजयी

नवलपुर। नवलपुरको कोल्हुवामा आजदेखि सुरु भएको छैटौं संस्करणको राईनो संरक्षण गोल्डकपको उद्घाटन खेलमा सेन्टर कलेज फोर ब्रदर भुमही विजयी भएको छ । विरगञ्ज युनाईटेड क्लबलाई २-१ गोल अन्तरले हराउँदै सेन्टर कलेज फोर ब्रदरले प्रतियोगितामा जित निकालेको हो ।

खेलमा फोर ब्रदरका लागि बिनोद केवट र फागुराम चौधरीले एक एक गोल गरेका थिए । खेलको अन्तिम ४ मिनेटमा वीरगंज यूनाइटेडका बिकास चौधरीले एक गोल फर्काएका थिए । त्यस्तै आजको खेलमा सेन्टर कलेज फोर ब्रदर भुमहीका खेलाडी फागुराम चौधरीले म्यान अफ द म्याच घोषित भएका छन् । उनलाई नगद रु ५ हजार नगद पुरस्कार गण्डकी प्रदेश खेलकुद परिषद्का सदस्य सचिव श्रीधर शर्माले हस्तान्तरण गर्नुभयो।

प्रतियोगिता अन्तरगत आइतबार हनामी बीएफसी चितवन र गण्डकी प्रदेशको फुटबल टीम बीच प्रतिस्पर्धा हुने आयोजकले जनाएको छ । राइनो क्लब, मध्यविन्दु–४ नवलपुरको आयोजनामा जारी प्रतियोगिताको विजेताले उपाधिसहित नगद ८ लाख प्राप्त गर्नेछ भने उपविजेताले ४ लाख प्राप्त गर्नेछ ।

प्रतियोगिताको सर्वोत्कृष्ट खेलाडीले २० हजार रुपैयाँ प्राप्त गर्नेछन् । यस्तै, सर्वाधिक गोलकर्ताले १० हजार र हरेक खेलको म्यान अफ द म्याच घोषित हुने खेलाडीले ५ हजार रुपैयाँ प्राप्त गर्नेछन् । प्रतियोगितामा नेपाल आर्मी, सेन्टर कलेज फोर ब्रदर भुमही, २८ बिगाहा, लुम्बिनी प्रदेश, संकटा क्लब, मछिन्द्र क्लब, हनामी बीएफसी क्लब, गण्डकी प्रदेश, बागमती प्रदेश, एपीएफ र पुलिस क्लब सहभागी हुनेछन् ।