बालबालिकाको लागि लगानी गर्न प्रतिबद्ध छौं: नगर प्रमुख न्यौपाने

दिपक शर्मा,देवचुली। देवचुली नगरपालिकाका नगर प्रमुख हरिप्रसाद न्यौपानेले बालबालिकाको लागि लगानी गर्न नगरपालिका प्रतिबद्ध रहेको बताउनुभएको छ। बुधबार नगर बाल संजाल र वडा बाल संजालका प्रतिनिधिहरुसँग अन्तरक्रिया कार्यक्रममा नगर प्रमुखले सो कुराको उदघोष गर्नुभएको हो।

नेपालको दोस्रो बालमैत्री नगरमा बालबालिकाहरुले के के कुराको माग र खोजी गर्नुभयको छ भनि नगर प्रमुखले कुरा सुरु गर्दा बालबालिकाहरु आफ्नै घरको बुवाले सोधे जसरी नै सजिलै आफ्ना कुरा सुरु गरे ।बालबालिकाहरुले बाल बिवाह अझै पनि रहेको र पहिला जस्तो अभिभावकले गर्ने हैन कि आफै गर्ने हुनाले यसको रोकथामको लागि किशोर किशोरिलाई लक्षित अभियान सुरु गर्नुपर्ने उनीहरूले बताए ।

नगरमा केहि बालबालिकाहरु शिक्षा प्राप्ति गर्नमा समस्यामा रहेकोले नगरले सबैलाई अनिवार्य रूपमा शिक्षा निशुल्कको लागि पहल गर्न माग गरेका थिए।बालबालिका अध्ययन गर्ने विद्यालय वरिपरि र खुला रूपमा धूम्रपान र मधपान बिक्री वितरण भइरहेकाले सो रोकथामको लागि निति निर्माण गर्नुपर्ने बालबालिकाको आवाज रहेको थियो ।

करिब २ दर्जन जति प्रश्न लिएर नगर प्रमुख न्यौपानेले बालबालिकाको लगानी नगरको पहिलो प्राथमिकता रहेको र यसको लागि निरन्तर लागिरहने बताउनु भयो ।अशक्त, गरिब, अनाथ र सीमान्तकृत समुदायका बालबालिकाको लागि अघिल्लो वर्ष ४८ लाख बजेट विनियोजन गरि १२०० बालबालिकालाई पढ्न सहयोग गरेको बताउँदै त्यस्ता कार्यक्रमहरु अव आगामी बर्ष पनि निरन्तर गरिने बताउनु भयो ।

बालबालिकाको लागि आवश्यक खेलकुद, अतिरिक्त क्रियाकलाप, बालमैत्रीको दिगोपन, किशोरीहरुको शसक्तिकरणको लागि समेत निरन्तर लागिरहने र यसको लागि बेला बेलामा खबरदारी गर्न समेत बालबालिकालाई नगर प्रमुखले अनुरोध गर्नुभयो ।

कार्यक्रममा बालमैत्री परामर्शदाता खिमानन्द भुसाल, नारायण पौडेल र बाल अधिकारकर्मिद्वय केबि राना र दिपक शर्माले सहजीकरण गर्नुभयको थियो ।नगर बाल संजालका अध्यक्ष आस्था अधिकारीको अध्यक्षतामा भएको कार्यक्रमको संचालन संजालका सचिव सुरक्षा ज्ञवालीले गर्नुभएको थियो।