मध्यविन्दुमा क्षमता अभिवृद्धि तालिम सम्पन्न

चोरमारा।अनौपचारिक क्षेत्र सेवा केन्द्र इन्सेक गण्डकी प्रदेश कार्यालयको आयोजनामा नवलपरासी (बर्दघाट सुस्ता पूर्व) को मध्यविन्दु नगरपालिकामा दुई दिन सञ्चालन भएको मानवअधिकार समूहका सदस्य र सरोकारवालाहरूको लागि क्षमता अभिवृद्धि तालिम समूहको कार्ययोजना निर्माण गर्दै सम्पन्न भएको छ ।

तालिमको अन्तिम दिन समूहका सदस्य तथा सरोकारवालाहरुको समूह बिभाजन गरी विषगत रुपमा कार्ययोजना निर्माण गरिएको थियो । मध्यविन्दु नगरपालिकामा शिक्षा, स्वास्थ्य, वातावरण र जातीय विभेद विरुद्धको समस्या पहिचान सहित पैरवीका लागि योजना निर्माण गरिएको हो । समस्याको पहिचान सहित सम्बन्धित सरोकारवाला निकायको पहिचान गरी समस्या समाधानको लागि समूहले गर्ने कार्यबारे कार्ययोजना निर्माण गरिएको थियो ।

दुई दिन सम्म सिकेका सिकाई र निर्माण गरिएको कार्ययोजना कार्यान्वयनको लागि मानव अधिकार समूह क्रियाशिल रहने मानव अधिकार समूह मध्यविन्दु नगरपालिकाका अध्यक्ष भुपलाल अर्यालले बताए । दुई दिनसम्म तालिममा प्राप्त सिकाई र समूह छलफलबाट पहिचान गरिएका सवालहरुको पैरवी गर्ने दायित्व स्थानीय मानव अधिकार समूहको भएको इन्सेक गण्डकी प्रदेश कार्यालयका संयोजक शिव खकुरेलले बताए । त्यसका लागि स्थानीय सरकारसँगै सम्बन्धित सरोकारवाला निकायसँगको सम्बन्ध बिस्तार र सहकार्य आवश्यकता रहेकोमा उनले जोड दिए ।

मध्यविन्दु नगरपालिका मानव अधिकार समूहका सदस्य र नगरपालिकाका जनप्रतिनिधिहरुको सहभागितामा सञ्चालित तालिममा मानव अधिकारको अवधारणा, आर्थिक सामाजिक तथा सांस्कृतिक अधिकार, शिक्षा स्वास्थ्य वातावरण र जातिय विभेद विरुद्धको अधिकार सम्बन्धि मध्यविन्दु नगरपालिकाको नीति तथा कार्यक्रम र कार्यान्वयनको अवस्था, मध्यविन्दु नगरपालिकामा अधिकार कार्यान्वयनको अवस्थाबारे सामुह छलफल, सुशासन र मानव अधिकार, मानव अधिकार विकास पद्धती एक अवधारणा, मानव अधिकार समुहको काम कर्तव्य तथा आचारसंहिता बारे प्रस्तुति भएको थियो ।

तालिममा प्रदेश संयोजक शिव खकुरेल, इन्सेक कार्यक्रम अधिकृत सवनम शर्मा, जिल्ला सहजकर्ता राजु चापागाईं, मध्यविन्दु नगरपालिकाका प्रमुख प्रशासकीय अधिकृत ज्ञानुप्रसाद पनेरुलगायतले सहजीकरण गरेका थिए ।