पूर्व पश्चिम राजमार्ग अन्तरगत देवचुली नगर खण्डमा बिग्रिएको सडक मर्मत गरिने

देवचुली । पूर्व पश्चिम राजमार्ग अन्तरगत देवचुली नगर खण्डमा बिग्रिएको सडक मर्मत गरिने भएको छ । मंगलबार देवचुली नगरपालिका र बुटवल नारायणगढ सडक निर्माण आयोजनाका प्रतिनिधिहरु बिच भएको छलफलमा यथासिघ्र सडक मर्मत गरि आवागमन सहज गर्ने निर्णय भएको हो ।

देवचुली नगरपालिकाको तर्फबाट नगर प्रमुख हरिप्रसाद न्यौपाने, उप प्रमुख पार्वता तिवारी, नगर प्रवक्ता तिल प्रसाद काफ्ले ,प्रमुख प्रशासकीय अधिकृत मोहनप्रसाद मरासिनी र एडिबीका आयोजना निर्देशक सुशिलबाबु ढकाल,चाईना स्टेट कम्पनीका नेपाल प्रतिनिधि सु यान , सडक विभागका ईन्जिनियर धिरज ढकाल , बुटवल नारायणगढ पुर्वी खण्ड आयोजना प्रमुख रमेश दिष्टी लगायतको उपस्थितमा छलफल गरिएको हो ।

बुटवल – नारायणगढ सडक खण्डको स्तरोन्नतिको क्रममा बिग्रिएका सडकका कारण दैनिक यात्रुहरुलाई सास्ती भएको गुनासो आएसंगै नगरपालिकाको पहलमा उक्त छलफलको आयोजना गरिएको नगरपालिकाले जनाएको छ ।छलफलमा सडक मर्मतसंगै सडक मर्मतमा आवश्यक पर्ने माटो लगायतका अन्य सामाग्रीको लागि नगरपालिकाले सहजीकरण गर्ने समेत निर्णय भएको छ ।

यस खण्डको सडकमा पानी पर्नासाथ हिलो र घाम लाग्ना साथ धुलो उड्नुका साथै साना देखि ठुला खाडलहरु दुर्घटनाको कारण बनेकाले नगरपालिकाले आयोजना निर्माण कम्पनीसँग छलफल गरि तुरुन्त सडक मर्मत गर्न लगाएको नगर प्रमुख न्यौपानेले बताउनुभयो।