कावासोती नगरपालिकामा खेलकुद शिक्षक प्रशिक्षण सम्पन्न

कावासोती । कावासोती नगरपालिकामा खेलकुद शिक्षक प्रशिक्षण सम्पन्न गरिएको छ । कावासोती नगरपालिका खेलकुद विकास समितिको आयोजनामा शुक्रबार कावासोती नगरपालिकाको सभाहलमा खेलकुद शिक्षकहरुलाई प्रशिक्षण गरिएको हो ।

कावासोती नगरपालिका भित्र रहेका विद्यालयका खेलकुद शिक्षकहरुलाई आधारभूत तहस्तरीय एथलेटिक्स प्रतियोगिता र राष्ट्रपति रनिङ शिल्ड प्रतियोगिता खेलाइने सम्पुर्ण खेलहरुको बारेमा प्रशिक्षण दिन कार्यक्रम राखिएको कावासोती खेलकुद विकास समितिका अध्यक्ष ध्रुव खनालले जानकारी दिनुभयो । एथलेटिक्स, भलिबल, कबड्डी लगायत खेलको बारेमा प्रशिक्षण दिइएको उहाँले बताउनुभयो ।

कावासोती खेलकुद विकास समितिका अध्यक्ष ध्रुव खनालको अध्यक्षतामा भएको खेलकुद शिक्षक प्रशिक्षण कार्यक्रमको उदघाटनमा नगर प्रमुख विष्णुप्रसाद भुसालको प्रमुख आतिथ्यता रहेको थियो । त्यसै गरि कार्यक्रममा जिल्ला खेलकुद विकास समितिका अध्यक्ष सेतबहादुर पुन, सदस्य तेज कुँवर लगायत विद्यालयका खेल शिक्षकहरुको उपस्थिति रहेको थियो ।

प्रशिक्षणलाई पुर्व राष्ट्रिय खेलाडी तथा एथलेटिक्स प्रशिक्षक सुरेन्द्र थनेत, जिल्ला भलिबल प्रशिक्षक सरोज महतो, कबड्डी प्रशिक्षक महिमा थनेतले प्रशिक्षण दिएको आयोजकले जनाएको छ ।

कार्यक्रममा कावासोती नगरपालिकाभित्रका विद्यालयका शिक्षकहरुको सहभागिता रहेको छ । कार्यक्रमको उदघाटन सत्रमा कावासोती नगरपालिका खेलकुद विकास समितिका उपाध्यक्ष तिर्सन घर्तीले स्वागत मन्तव्य राख्नुभएको थियो भने समितिका सदस्य यमकला पौडेलले कार्यक्रमको संचालन गर्नुभएको थियो ।