सेभेन ए साइड फुटबल प्रतियोगिताको उपाधि प्रगतिकला मन्दिर युवा क्लबलाई

देवचुली । देवचुली नगरपालिकामा संचालित दोस्रो सेभेन ए साइड फुटबल प्रतियोगिताको उपाधि आयोजक प्रगतिकला मन्दिर युवा क्लबले जितेको छ । हरितालिका तीजको अवसरमा प्रगतिकला मन्दिर युवा क्लबको आयोजनामा जन ज्योति नमुना माविको खेलमैदानमा शनिबार भएको देवचुली-११ का विरुद्ध आयोजकका बीचको फाइनल खेलमा विजयी हुँदै आयोजकले उपाधि जितेको हो ।

फाइनल खेलमा आयोजकले देवचुली-११ लाई ट्राइबेकरमा २-० गोल अन्तरले हराएको हो । निर्धारित समयको खेलमा दुवै टिमबाट गोलरहित बराबरी पछि खेल ट्राइबेकरमा गएको थियो । प्रतियोगिताको बिजेता प्रगतिकला मन्दिर युवा क्लबले ४७ हजार रुपैयाँ नगद सहित मेडल, ट्रफी र प्रमाणपत्र प्राप्त गरेको छ भने उप -बिजेता देवचुली-११ ले २६ हजार रुपैयाँ नगद सहित मेडल, ट्रफी र प्रमाणपत्र प्राप्त गरेको छ । फाइनल खेलमा प्रगतिकला मन्दिर युवा क्लबका विशाल बिक म्यान अफ दि म्याच भएका थिए । त्यसै गरि प्रतियोगिताको उत्कृष्ट खेलाडी प्रगतिकला मन्दिर युवा क्लबका नवीन थापा, सर्वाधिक गोलकर्ता देवचुली-११ का रोहन पुलामी र सर्वोकृष्ट गोलरक्षक प्रगतिकला मन्दिर युवा क्लबका विशाल बिक भएका थिए ।

प्रगतिकला मन्दिर युवा क्लबका कार्यवाहक अध्यक्ष ठाकुर न्यौपानेको अध्यक्षतामा भएको प्रतियोगिता समापन समारोहमा प्रगतिनगर खानेपानी तथा सरसफाइ उपभोक्ता संस्थाका अध्यक्ष डिल्लीराम कडरियाको प्रमुख आतिथ्यता रहेको थियो । त्यसै गरि देवचुली-१४ का वडा सदस्य मनोज श्रेष्ठ, नगर युवा तथा खेलकुद विकास समितिका अध्यक्ष दिपकचन्द्र भट्टराई, प्रगतिनगर खानेपानी तथा सरसफाइ उपभोक्ता संस्थाका सचिव विष्णुप्रसाद न्यौपाने लगायत खेलप्रेमीहरुको उपस्थिति रहेको थियो । समापन कार्यक्रमको उदघाटन सत्रमा क्लबका कोषाध्यक्ष प्रकाश श्रेष्ठले स्वागत मन्तव्य राखेका थिए भने राकेश बिकले कार्यक्रमको सहजीकरण गरेका थिए ।