विनयी त्रिवेणीमा मानव अधिकार सम्बन्धि अभिमुखिकरण कार्यक्रम सम्पन्न

नवलपुर। नवलपरासी पूर्व नवलपुरको विनयी त्रिवेणी गाउँपालिकामा मानव अधिकार सम्बन्धि अभिमुखिकरण कार्यक्रम शुक्रबार सम्पन्न भएको छ ।

अनौपचारिक क्षेत्र सेवा केन्द्र (इन्सेक) नवलपुरको आयोजना, विनयी त्रिवेणी गाउँपालिकाको सहयोग र मानव अधिकार समूह विनयी त्रिवेणी गाउँपालिकाको सहकार्यमा आयोजित कार्यक्रममा विनयी त्रिवेणी गाउँपालिका वडा नंं १ र २ का सरोकारवालाहरुको सहभागिता रहेको थियो ।

कार्यक्रममा प्रशिक्षक विनयी त्रिवेणी गाउँपालिकाका कानुनि सल्लाहकार अधिवक्ता गणेश अधिकारीले मानव अधिकार संरक्षण गर्नु राज्यको दायित्व भएको बताउनुभयो । नेपालले हस्ताक्षर गरेका विभिन्न अन्तराष्ट्रिय महासन्धि तथा सन्धिहरुको कार्यान्वयन गर्दै मानव अधिकार प्राप्त गरेको अनुभूति आम नागरिकले गर्न पाउनु पर्ने उहाँले बताउनुभयो । उहाँले कार्यक्रममा नेपालले हस्ताक्षर गरेका विभिन्न अन्तराष्ट्रिय महासन्धि तथा सन्धिहरुको बारेमा जानकारी गराउनु भएको थियो ।

यस्तै कार्यक्रममा इन्सेक नवलपुर जिल्ला प्रतिनिधि तिर्थराज डुम्रेले नागरिक तथा राजनितिक अधिकार र आर्थिक, सामाजिक तथा सांस्कृतिक अधिकारको बारेमा सहजिकरण गर्नु भएको थियो । यस्तै उहाँले नेपालको संविधान २०७२ मा मौलिक हकको रुपमा व्यवस्था गरिएका अधिकारहरुको बारेमा प्रस्तुतिकरण गर्नु भएको थियो । यस्तै उहाँले नवलपरासी पूर्व नवलपुरमा मानव अधिकार सवालहरु के के छन् भन्ने विषयमा सहभागीहरुसंग छलफल तथा सहजिकरण गर्नु भएको थियो ।

अभिमुखिकरण कार्यक्रममा यस अगाडी उद्घाटन शत्रमा बोल्दै विनयी त्रिवेणी गाउँपालिकाका उपाध्यक्ष मिना कुमारी रानाले मानव अधिकारको विषयमा इन्सेकले गाउँपालिकामा निरन्तर पैरवी गरिरहेको भन्दै धन्यवाद प्रकट गर्नु भएको थियो । गाउँपालिका मार्फत बालबालिका, जेष्ठ नागरिक, महिला, अपाङ्गता भएका व्यक्ति, लक्षित समुदायहरुको लागि बजेट विनियोजन गरेर उनिहरुको अधिकार प्रत्याभूति गराउन निरन्तर सहयोग गरिरहेको बताउनुभयो ।

गाउँपालिका प्रमुख प्रशासकीय अधिकृत नर बहादुर बि.क.ले मानव अधिकारको विषय व्यापक र संवेदनशिल रहेको भन्दै समय र बिकासक्रम सगै यसको दायरा बढ्दै गएको बताउनुभयो । मानव मानवबीचको बिभेद, असमानता जस्ता सवालमा धेरै सुधारहरु भएको देखिएपनि अझै पनि मुलभूत रुपमा त्यसको निराकरण हुन नसकेको उहाँले बताउनुभयो ।

विनयी त्रिवेणी गाउँपालिका वडा नं. २ का वडा अध्यक्ष विष्णु ढकालले संविधानले दिएको अधिकार प्रयोग संगै नागरिकहरु आफ्नो दायित्वको बारेमा पनि सजक बन्न आवश्यक रहेको बताउनु भएको थियो । सबैको साँझा प्रयत्नबाट नै समाजमा विद्यामान बाल विवाह, छुवाछुत, महिला हिंसा, विभेदको अन्त्य हुन सक्ने भन्दै उहाँले स्थानीय सरकार सदैव अधिकारको प्रत्यायोजन गर्ने विषयमा गम्भीर रहेको बताउनु भएको थियो ।

कार्यक्रममा मानव अधिकार समूह विनयी त्रिवेणी गाउँपालिकाका अध्यक्ष धर्म बहादुर जि.सी.ले गाउँपालिकामा मानव अधिकार समूह गठन भएर मानव अधिकार रक्षा र त्यसका सवालहरुमा पैरवी गरिरहेको भन्दै स्थानीय सरकारले मानव अधिकार सम्बन्धि अभिमुखिकरणको लागि सहयोग र इन्सेकले आयोजना गरेकोमा धन्यवाद व्यक्त गर्नु भएको थियो ।

कार्यक्रममा गाउँपालिकाका सुचना अधिकारी कृष्ण अर्याल, विनयी त्रिवेणी गाउँकार्यपालिका सदस्य रुपा दर्जी लगायतको उपस्थिति रहेको थियो । कार्यक्रमको सहजिकरण इन्सेक नवलपुर सहजकर्ता गंगा विश्वकर्माले गर्नुभएको थियो ।