वडाध्यक्ष कप फुटबल प्रतियोगिताको उपाधी अभिषेक चर्च रजहरलाई

राजु चापागाई, देवचुली। देवचुलीमा संचालित प्रथम खुल्ला नकआउट वडाध्यक्ष कप फुटबल प्रतियोगिताको उपाधी अभिषेक चर्च रजहरले जितेको छ ।

देवचुली- १० को समन्वयमा शान्तिदीप युवा क्लबको आयोजनामा शान्तिदीप युवा क्लबको खेल मैदान देवचुली- १० मा संचालित प्रतियोगिता अन्तर्गत सेन्ट्रल कलेज २८ बिगाहा र अभिषेक चर्च रजहरबीच भएको फाइनल खेलमा अभिषेक चर्च रजहर २-१ गोल अन्तरले विजयी भएको हो ।शनिबार भएको फाइनल खेलमा अभिषेक चर्च रजहरका तर्फबाट योमीले १ गोल र सेन्ट्रल कलेज २८ बिगाहाका सुदीप तामाङले वोन गोल गरेका थिए भने सेन्ट्रल कलेज २८ बिगाहाका तर्फबाट नवीन महतोले गोल गरेका थिए ।

जितसँगै अभिषेक चर्च रजहरले नगद रु १ लाख २१ हजार,प्रमाणपत्र,मेडल र ट्रफी प्राप्त गरेको छ भने उप विजेता सेन्ट्रल कलेज २८ बिगाहाले नगद रु ७५ हजार,प्रमाणपत्र,मेडल र ट्रफी प्राप्त गरेको छ । त्यस्तै सेमिफाइनलबाट बाहिरिने प्रगतिकला मन्दिर युवा क्लब र बरटाँडी युवा क्लबले नगद रु ११ हजार प्राप्त गरेका थिए ।

प्रतियोगिताको सर्वोत्कृष्ट गोलरक्षक अभिषेक चर्च रजहरका अजित गुरुङ,सर्वोत्कृष्ट खेलाडी सेन्ट्रल कलेज २८ बिगाहाका सुनिल श्रेष्ठ र सर्वाधिक गोलकर्ता अभिषेक चर्च रजहरका योमी भएका थिए । सर्वोत्कृष्ट गोलरक्षक, सर्वोत्कृष्ट खेलाडी र सर्वाधिक गोलकर्तालाई मेडल, प्रमाणपत्र सहित पुरस्कार प्रदान गरिएको थियो ।

प्रतियोगिताको विजेता, उप विजेता तथा सर्वोकृष्ट खेलाडीहरुलाई देवचुली नगरपालिका वडा न १० का अध्यक्ष केशर आलेले पुरस्कार प्रदान गरेका थिए । मंसिर ११ गतेदेखी संचालित प्रतियोगितामा १६ टिमहरुको सहभागिता रहेको थियो ।

शान्तिदिप युवा क्लबका अध्यक्ष अमर घर्ती मगरको अध्यक्षतामा भएको प्रतियोगिताको समापन कार्यक्रममा देवचुली नगरपालिका वडा न १० का अध्यक्ष केशर आलेको प्रमुख आतिथ्यता रहेको थियो । त्यस्तै जिल्ला खेलकुद विकास समितिका अध्यक्ष सेतमान पुन,नगर खेलकुद विकास समितिका अध्यक्ष भीमलाल तिवारी ,विभिन्न वडाका अध्यक्षहरु, वडा सदस्यहरु,विभिन्न संघसंस्थाका प्रतिनिधिलगायत स्थानीयहरुको बाक्लो उपस्थिति रहेको थियो । समापन समारोहको सहजीकरण क्लबका सचीव डण्डापानी न्यौपानेले गरेका थिए ।