आज:  २०८० फागुन १४, सोमबार | Mon, 26, Feb, 2024 Search
FLASH NEWS

देवचुली ९ मा नि:शुल्क आयुर्वेद स्वास्थ्य शिविर सम्पन्न

    प्रकाशित २०८० बैशाख १०, आईतबार (१० महिना अघि)

देवचुली। देवचुली नगरपालिका वडा नम्बर ९ मा नि:शुल्क आयुर्वेद स्वास्थ्य शिविर सम्पन्न भएको छ । देवचुली नगरपालिका आयुर्वेद शाखाको आयोजनामा शनिबार विभिन्न किसिमका रोगहरुमा एक दिने नि:शुल्क आयुर्वेद स्वास्थ्य शिविर सम्पन्न भएको हो ।


शिविरमा २ सय ८८ जनाले स्वास्थ्य सेवा लिएका थिए ।स्थानीय बासिन्दाहरुलाई लक्षित गरि संचालित स्वास्थ्य शिविरमा नि:शुल्क विभिन्न रोगको उपचार सेवाहरु प्रदान गरिएको थियो। जसअन्तर्गत उपचार गराएका बिरामीहरुलाई नि:शुल्क औषधी समेत वितरण गरिएको देवचुली नगरपालिका आयुर्वेद शाखा प्रमुख कृष्ण प्रसाद शर्माले बताउनुभयो । यस्तै शिविरबाट नि:शुल्क आयुर्वेदिक पद्धतीबाट सबैखाले रोगहरुको उपचार तथा परामर्श दिईएको थियो। शिविरमा डाक्टर चन्द्रकान्त ज्ञवालीको नेतृत्वमा वरिष्ठ कविराजहरुको टिमले बिरामीहरुको चेकजाँच गरेका थिए ।

देवचुली नगरपालिका वडा नम्बर ९ का वडा अध्यक्ष बलिराम सापकोटाको अध्यक्षता भएको शिविरको उदघाटनमा देवचुली नगरपालिकाका नगर उप प्रमुख पार्वता तिवारीको प्रमुख आतिथ्यता रहेको थियो। त्यसै गरि देवचुली नगरपालिकाका प्रमुख प्रशासकीय अधिकृत मोहनप्रसाद मरासिनी,कार्यपालिका सदस्य मधुमाया गुरुङ,वडा सदस्यहरुलगायतको उपस्थिति रहेको थियो।

शिविरको उदघाटन गर्दै प्रमुख अतिथि देवचुली नगरपालिका नगर उप प्रमुख पार्वता तिवारीले अस्पतालसम्म जान नसक्ने घरपरिवारका बिरामीलाई स्वास्थ्य शिविरले महत्वपुर्ण सेवा प्रदान गर्ने अपेक्षा आफुले लिएको बताउनुभयो । स्वस्थ पानी,स्वस्थ खाना जस्तै आयुर्वेदीक औषधी आफुहरुको जीवनमा निकै उपयोगी हुने तिवारीले बताउनुभयो।

देवचुली नगरपालिका वडा नम्बर ९ का अध्यक्ष बलिराम सापकोटाले आगामी दिनहरुमा समेत वडाबासीको स्वास्थ्यलाई मध्यनजर गर्दै विविध किसिमका स्वास्थ्य शिविरको आयोजना गरिने जानकारी दिनुभयो ।वडामा नि:शुल्क रुपमा आयुर्वेद स्वास्थ्य शिविर राखिएकोमा सेवाग्राही निकै खुसी भएका छन् । स्वास्थ्य शिविर कार्यक्रमको सञ्चालन आयुर्वेद शाखाका प्रमुख कृष्णप्रसाद शर्माले गर्नुभएको थियो।

Write your Comment