देवचुली १० को बाल उद्यानमा सरसफाईसँगै फूल रोपियो

देवचुली । देवचुली नगरपालिका वडा न १० मा रहेको बाल उद्यानमा विभिन्न प्रजातिका फूलहरु रोपिएको छ। शान्तिदिप युवा क्लबको आयोजनामा उद्यान, खेलमैदान र क्लबको भवन सरसफाइ गरि उद्यानमा विभिन्न प्रकारका फूलहरु रोपिएको हो।

बाल उद्यानमा घाँस, झाडीहरु सफाई गर्दै २५० वटा सयपत्री फूलको बिरुवा,१२ वटा धुपी र स्थानीय फूलहरु रोपण गरिएको क्लबका अध्यक्ष अमर घर्ती मगरले जानकारी दिए। भाईटिकाको समयमा क्लबद्वारा स्थानीयलाई फूल वितरण गर्ने र उद्यान नजिकै रहेको मन्दिरमा आउने धर्मावलम्बीहरुलाई आवश्यक पर्ने फूलहरु लैजान सहज होस भनेर फूल रोपिएको अध्यक्ष घर्ती मगरले बताए। बाल उद्यानमा बर्खासँगै घाँस झाडी बढेकाले सफाई गरिएको र घुम्न आउनेहरुका लागि सहज हुने अपेक्षा लिइएको उनले बताए ।

समृद्ध वडा बनाउन सबैले सहकार्य गर्नुपर्ने देवचुली वडा नम्बर १० का वडा अध्यक्ष रेप्तीकुमार घर्ती मगरले बताए । चाडपर्वको बेलामा फूलको माग बढी हुने र फूल पाउन नि समस्या हुने भएकाले क्लबले सरसफाइसहित विभिन्न फूलका बिरुवा रोप्ने अभियान उत्कृष्ट भएको उनको भनाई छ। सरसफाई तथा वृक्षारोपण कार्यक्रममा जनप्रतिनिधि तथा स्थानीयहरुको सहभागिता रहेको थियो।