प्रथम वडा अध्यक्ष कप अन्तर विद्यालय फुटबल प्रतियोगिता : देवचुली मावि क्वाटर फाइनल प्रवेश

देवचुली । देवचुली-१७ मा संचालित प्रथम वडा अध्यक्ष कप अन्तर विद्यालय फुटबल प्रतियोगितामा बिहीबार देवचुली मावि विजयी भएको छ । फारम खेलकुद विकास समितिको आयोजनामा वरचुली माविको खेल मैदानमा प्रतियोगिता संचालन गरिएको हो ।

देवचुली माविले जनक माविलाई १-० गोल अन्तरले हराउँदै क्वाटरफाइनलमा प्रवेश गरेको हो । खेलमा देवचुली माविका पुस्कर कुमालले गरेको गोल नै निर्णायक भएको थियो । बिहीबारको खेलमा जनक माविका आशिष कुमाल म्यान अफ दि म्याच भएका थिए ।

नवलपुरका १६ वटा विद्यालयहरुको सहभागिता रहेको प्रतियोगितामा प्रथम हुने टिमले नगद ३० हजार रुपैयाँसहित मेडल, ट्रफी र प्रमाणपत्र प्राप्त गर्नेछ भने द्वितीय हुने टिमले नगद २० हजार रुपैयाँ सहित मेडल, ट्रफी र प्रमाणपत्र प्राप्त गर्नेछ । त्यसै गरि प्रतियोगिताका प्रत्येक खेलका म्यान अफ दि म्याचलाई पुरस्कारको व्यवस्था रहेको आयोजकले जनाएको छ ।

प्रतियोगिता अन्तरगत शुक्रबार जन ज्योति माविका विरुद्ध शिव माध्यमिक विद्यालयबीच खेल हुने फारम खेलकुद विकास समितिका अध्यक्ष सुजन सापकोटाले जानकारी दिए ।